tën dëtąnı́hılé k’é t’á hołé há ɂëdırı dëtł’ıs sı

On thın ıce tën dëtąnı́hılé k’é t’á hołé há ɂëdırı dëtł’ıs sı

ɂëdısı́ ɂëdza nęnę k’eyaghe nı̨dhá ɂedų háhuné hıjá sı. Nıh k’e ɂası t’á ɂëdų tth’ı́ hané hıjá sı clımate change t’á, nıh tth’ı́ ghaladá tth’ı́ hu, dëne yunaghë hots’ı̨ nıh hëthedel hıjá hu horelyų ɂëdza nęnę nanehóɂá ɂëłk’esı́ sı, ku ɂëdırı t’á dëne bá tth’ı́ yası́ honejer tth’ı hoɂą bet’á. Ku t’áhą dué hoɂą tth’ı́ ghónı horelyų ɂedırı́ t’á kulı́ t’á dëne bëtth’ı́ ɂá dué sı bá hųzų hılé sı chu bá horełnı́ sı ɂëdųhų.

Ną̨́nı́ tth’ı́ naıdıé gháladá kuę ch’ası́ nı̨dhá naradé hu, dzıredıł tth’ı bá horená chu ɂëłch’ası nı̨dhá naradé hú bëkuę tth’ı́ dué hu ɂëdza nęnę tth’ı hok’ath natser dąlı̨ horená sı dëne xa. Ku ɂëdırı t’á dëne dëne hel ɂası holé dezą ɂëdızı̨ ɂëdza nęnę k’eyaghë dëne dadathëɂá sı bá.

ɂá ɂëdırı project thın ıce tën dëtąnı́hılé k’ı́ dëne ts’eranı́ ha nųt’ą sı dëne t’ą ba horená sı ts’eranı́ há chu bëł ɂasıe ghą nodhı dé beł há ɂëdırı dëne (benı́, betth’ı́ ɂá chu t’á ɂá daghı̨ɂá sı há) ɂeyı datëdhı́ tth’ı́ t’ą dëne bá horená sı tth’ı hel hats’edı́ sı ɂëdısı́ ɂëdza nęnę honaré k’ı́ ɂëdırı dałtsı́ hası̨:

  • T’ą dëne beł sughua hoɂąhılé sı beł hoɂą ɂasıe ghą́ yatı dé;
  • T’ą dëne ɂası ghą k’oldé sı ɂeyer t’ą dëne naradé sı hel hotıe hołɂą hoɂą ɂedırı dëne bënakanełnı̨ ha bëł dué ch’á;
  • Ku honesı́ nıh bąnı́ ɂëdırı́ ląt’é dëne ts’edı́ hots’ı̨̨́ yatıé deɂą sı hokanótá bët’á bët’oreɂá ɂëdısı́ ɂëdza nęnę naré;
  • Dëne tth’ı́ hokëtł’á bël yatı́ hoɂą yenerenı̨ há, dëne t’ą beł horená sı ts’eradı́ ha benęnę k’eyaghë, ɂëdırı dëne ɂëłts’eradı́ t’á horelyų ɂëłá ɂıłaghe yatı k’é ɂasıe k’enats’edé há;
  • ɂëłá yatı́ hołé chu dëne ch’alanıé tth’ı́ k’ánotá tth’ı́ hoɂą bët’á dëne ts’en yatı det’al dé;
  • ɂëją nuhënęnę naré t’ąt’u sëhenųt’ą dëne ts’edı́ ha horelyų ɂëłá yatı hołé hoɂą dëne t’ą daghı̨ɂá sı bá;
  • Ku ɂëdırı dëne t’ą dadáthëɂá sı chu t’á betth’ı́ ɂá bá horëná sı tthënę naradé dé t’ąt’ú bets’edı́ ts’en tthęnę ɂëdenakaghëlná walı́ sı ha honeltęn tth’ı́ hoɂą hotthé ts’en tth’ú, ɂeyer de bá horënáhahılé t’ats’en bets’edı́ hots’en.
  • Ku dëne nęnę nare tth’ı́ dëne hel ɂerıhtł’ıs kuę sekuı narade sı tth’ı yatı́ hoɂą ɂedırı ghą dëne t’ą daghı̨ɂá sı ts’edı́ ghą.

Ku ɂałų ɂëdırı thın ıce tën detą́nı́ hılé ghą honëresnı̨ nı̨dhen dé computer k’e nanųtá lá websıte k’e: www.onthınıce.ca. Ku t’ą ɂëdırı ha tsąmba nı̨ɂą k’ı́ Canada hots’ı̨ nıhts’en k’oldé hayı̨lá sı Socıal Development Partnershıps Program hulyé sı, ku t’ą betł’esı hetł’el hadé Global Allıance on Accessıble Technologıes and Envıronments (GAATES) hulyé sı, ku ɂëdırı dëne k’ı́ t’ą dëne bëtth’ı́ hę̈ręłt’é hılé sı ts’eranı́ hats’edı́ sı.

Ku GAATES ɂëdłaghë hats’edı́ ɂá

Ɂëdırı Global Allıance on Accessıble Technologıes and Envıronments (GAATES) hulyé sı, ku ɂëdırı dëne k’ı́ t’ą dëne bëtth’ı́ hę̈ręłt’é hılé sı ts’eranı́ hats’edı́ k’ı́ dëne ha ɂasıe łą k’enaradé sı nıh bąnı́. GAATES Canada nųt’ą nı̨ 2007 k’é hú horelyų nıh bąnı́ ɂëdųhų yets’eranı́ sı.

GAATES t’a hok’énádé k’ı́ dëne ɂëdırı ląt’é ɂası henerenı́ walı sı ha dëne hel yatı dałtsı́ sı t’ą dëne dadathëɂá ts’edı́ ha bël sughuá sëhóɂą há t’ok’é naradé sı ts’en. Ku beyatı́ t’á tth’ı́ dëne łą ts’eradı́ sı yoh hegą hu, bel sëhonųt’á há, yatı́ tth’ı́ bel hołé hu ɂąłnëdhe tth’ı́ bets’edı́ dąlı̨ ha nakorëldher ba horená hıjá dé. Hotıe horely̨ų dëne ɂëłts’eradı́ hats’edı́ sı ɂëdırı k’ı́.

Ku ɂałų ɂëdırı ghą honeresnı̨ nı̨dhen dé GAATES k’e nanųtá la ɂëją́; www.gaates.org k’e. Marsı tchogh.